क्यासिनो विवाद-आर्थिक दायित्व आधा घटाइने

" अन्ततः क्यासिनो नियमावली संशोधन तयारी "

केदार दाहाल-काठमाडौं, ११ कात्तिक  । क्यासिनो व्यवसायमा लगानीकर्ताले रुचि नदेखाएपछि सरकारले नियमावली नै संशोधन गर्ने भएको छ । क्यासिनोमा अत्यधिक लगानी गर्नुपर्ने प्रावधानका कारण नयाँ लगानीकर्ता पाउन नसकेपछि सञ्चालकले लिनुपर्ने आर्थिक दायित्वमा ५० प्रतिशतसम्म कटौती गर्ने तयारी छ । संस्कृति, पर्यटन तथा उड्डयन मन्त्रालयले गत वर्ष साउन ७ गते क्यासिनो नियमावली ०७० जारी गर्दै कडा प्रावधान राखेको थियो ।

 

नयाँ नियमावलीमा क्यासिनो सञ्चालनका लागि प्रत्येक व्यवसायी वा फर्मले ३५ करोड ५० लाख रुपैयाँभन्दा बढी जोहो गर्नुपर्ने व्यवस्था गरिएको थियो । तर, यो प्रावधानअनुसार क्यासिनो सञ्चालन गर्न नसकिने भन्दै पुराना सञ्चालकले नवीकरण गराएका छैनन् भने नयाँसमेत आएका छैनन् । पर्यटन, अर्थ मन्त्रालय र क्यासिनो सञ्चालकबीच भएको छलफलमा दायित्व कटौतीमा औपचारिक सहमतिसमेत भइसकेको छ ।

 

पर्यटन विभागका महानिर्देशक तुलसीप्रसाद गौतमले नियमावली संशोधनको तयारी भइरहेको पुष्टि गरे । “सबै क्षेत्रबाट आर्थिक दायित्व धेरै भयो भन्ने सुझाव आएकाले यसमा केही कटौती गरी नियवमावली संशोधनको तयारी गरिरहेका छौं,” उनले भने, “तर कति घटाउने भन्ने विषयमा औपचारिक निर्णय हुन भने बाँकी छ ।” अर्थसँग सहमति लिएर संशोधनको प्रक्रिया थालिएको जानकारी उनले दिए ।

 

क्यासिनो सञ्चालकहरूले १ वर्षदेखि आर्थिक दायित्व बढी भएको भन्दै त्यसलाई नघटाएसम्म नवीकरण नगर्ने अडान लिँदै आएका छन् । नियमावली संशोधन भए प्रत्येक क्यासिनोले १७ करोड ७५ लाख रुपैयाँ जोहो गरे पुग्नेछ । रोयल्टीबापत २ करोड रुपैयाँ तिर्नुपर्नेछ । यसअघि पनि वार्षिक रोयल्टी प्रतिक्यासिनो २ करोड रुपैयाँ थियो, नयाँ नियमावलीले यसमा शतप्रतिशत वृद्धि गरेको थियो । चुक्ता पँुजी १२ करोड ५० लाख, बैंक ग्यारेन्टी २ करोड, इजाजत दस्तुर १ करोड र निवेदन दस्तुर ५ लाख रुपैयाँ बनाउने तयारी पनि छ । अहिलेको नियमावलीअनुसार प्रत्येक क्यासिनोले ३५ करोड ५० लाखका दरले १० वटाले ३ अर्ब ५० करोड ५० लाख रुपैयाँ जोहो गर्नुपर्ने व्यवस्था छ ।

 

क्यासिनो सञ्चालकले नयाँ नियमावलीअनुसार सञ्चालन गर्न तथा वक्यौतासमेत तिर्न अटेर गरेपछि सरकारले वैशाखदेखि सबै क्यासिनो बन्द गरिदिएको थियो । नेपालमा मिनी क्यासिनोबाहेक १० वटा पाँचतारे होटलमा १० वटै क्यासिनो सञ्चालनमा थिए ।

 

क्यासिनो अन्ना (होटल डेल अन्नपूर्ण), माजोङ (होटल सोल्टी), सांग्रिला, रोयल (याक एन्ड यती, स्टार (ह्यात), एभरेस्ट, भेनस (होटल मल्ल) र ¥याड (¥याडिसन) सञ्चालनमा थिए । पोखरामा फूलबारी र पोखरा ग्रान्ड छन् ।

 

क्यासिनो र मिनी क्यासिनोको समेत गरी पुरानो वक्यौता ६७ करोड रुपैयाँ छ । चालू आवकै रोयल्टी र जरिवाना गरी ४१ करोड ६० लाख रुपैयाँ बाँकी छ । प्रत्येक क्यासिनोको भागमा १ वर्षको रोयल्टी ४ करोड र जरिवाना १ करोड २० लाख रुपैयाँ पर्छ । यस्तो रकम तिर्ने अवधि भदौ मसान्तमै सकिएको थियो । पटक–पटक म्याद थप गरिए पनि क्यासिनो सञ्चालकहरूले नवीकरणका लागि अटेर गर्दै आएका छन् ।