केदार दाहाल
काठमाडौं : घुमफिर वर्षलाई केन्द्रित गर्दै धमाधम पर्यटकीय प्याकेजहरू सार्वजनिक भएका छन् । सरकारले घोषणा गरेको आधा वर्षपछि बल्ल आन्तरिक पर्यटकलाई केन्द्रित गर्दै विभिन्न प्याकेजहरू सार्वजनिक गरिएका छन् ।
नेपाल पर्यटन बोर्ड र विभिन्न संस्थाहरूको सहकार्यमा प्याकेज सार्वजनिक गरिएको हो । नयाँ गन्तव्यको प्रवद्र्धन तथा पर्यटकीय गतिविधि बढाउन व्यावसायिक प्याकेज सुरु गरिएको बोर्डले जनाएको छ ।
पर्यटन बोर्डले नेपाल एसोसिएसन अफ टुर एन्ड ट्राभल एजेन्ट्स (नाट्टा), ट्रेकिङ एजेन्सिज एसोसिएसन अफ नेपाल (टान) र सोसाइटी अफ ट्राभल एन्ड टुर अपरेटर्स (सोट्टो) नेपालसँगको सहकार्यमा प्याकेज तयार गरेको हो ।
धेरैले घुमफिर वर्षलाई नै केन्द्रित गरेर प्याकेज ल्याउन अनुरोध गरेकाले औपचारिक रूपमै प्याकेज ल्याउन थालिएको नेपाल पर्यटन बोर्डका अधिकृत सुमन घिमिरे बताउँछन् ।
“बोर्डले नयाँ गन्तव्यको प्रवद्र्धन गर्न नसकेको आरोप लागिरहेकाले पनि नयाँ स्थानका प्याकेजहरू तयार पारेका हौं,” घिमिरेले भने ।
पहिलो चरणको प्याकेजमा हलेसी महादेव दर्शन टुर, जनकपुरधाम, पाथिभरा मन्दिरको भ्रमण, खप्तड टुर, लुम्बिनी–स्वर्गद्वारी भ्रमण टुुर, रारा टुर आदि छन् । यी पर्यटकीय प्याकेज पर्यटन व्यवसायीको सहकार्यमा तयार भएको हो ।
निकट भविष्यमै पदयात्रा, ¥याफ्टिङ, होमस्टे, क्यानोनिङसहितका पर्यटकीय प्याकेज पनि सार्वजनिक गर्ने तयारी भएको घिमिरेले जानकारी दिए ।
बोर्डले आफ्नो वेबसाइटमार्फत यस्तो प्याकेजको जानकारी दिएको छ । साथै सम्बन्धित पर्यटकीय संस्थामार्फत प्याकेज खरिद गर्न सकिनेछ । “पर्यटनको दीर्घकालीन विकासका लागि आन्तरिक पर्यटक नै मुख्य हो,” घिमिरेले भने ।
नेपालको पर्यटन व्यवसायको दरिलो आधार भनेकै आन्तरिक पर्यटक भएकाले नेपाल सरकारले घुमफिर वर्ष घोषणा गरेको घिमिरे बताउँछन् ।
हलेसी महादेव दर्शन टुर
नेपाल पर्यटन बोर्ड र नाट्टाको सहकार्यमा हलेसी महादेव दर्शन टुर प्याकेज सार्वजनिक गरिएको छ । आन्तरिक पर्यटकलाई लक्षित गरी सार्वजनिक गरिएको उक्त प्याकेजमा विशेष गरी धार्मिक पर्यटकहरू समावेश हुन सक्नेछन् ।
खोटाङ जिल्लामा रहेको हलेसी महादेव हिन्दूका साथै बौद्ध धर्मालवम्बीहरूको लागि समेत चर्चित क्षेत्र हो ।
सो क्षेत्रमा जानको लागि हवाई र सडक मार्ग दुवै प्रयोग गर्न सकिन्छ । सडक मार्गको प्रयोग गर्दा पहिलो दिन काठमाडौं–कटारी, जनकपुर अथवा विराटननगर जुनसुकै स्थानमा पनि जान सकिन्छ ।
पहिलो दिन : काठमाडौं–कटारी
दोस्रो दिन : कटारी–हलेसी
तेस्रो दिन : हलेसी महादेव दर्शन
चौथो दिन : कटारी हुँदै काठमाडौं
जनकपुरधाम
एतिहासिक मन्दिर जनकपुरधाम विश्वभरका हिन्दूहरूको लागि चर्चित छ । जनकपुरका लागि बोर्डले तीन दिने प्याकेज सार्वजनिक गरेको छ ।
पहिलो दिन : काठमाडौंबाट जनकपुर पुगेपछि आधा दिन जानकी मन्दिर, राम मन्दिर, विवाह मण्डप, राजदेवी मन्दिरलगायत क्षेत्रको अवलोकन गर्न सकिन्छ ।
दोस्रो दिन : बिहान ब्रेकफास्टपछि धनुष धामको पूजा, त्यसपछि सीताको विवाह भएको क्षेत्रलगायत ऐतिहासिक क्षेत्रको अवलोकन गर्न सकिन्छ । तेस्रो दिन काठमाडौं फर्किने ।
कोशी क्षेत्र
कोशी क्षेत्रमा जान पनि हवाई र सडक दुवै मार्गको प्रयोग गर्न सकिन्छ । यो पाँच दिने प्याकेज हो ।
पहिलो दिन : काठमाडौंबाट विराटनगर
पहिलो दिन : काठमाडौंबाट विराटनगर
दोस्रो दिन : आधा दिन नजिकमा क्षेत्रहरूको अवलोकन । सोही दिन ६० किलोमिटर दूरी पार गर्दै कोशी टप्पु क्षेत्रमा जान सकिन्छ । सो दिन सोही क्षेत्रमा बसोबास ।
तेस्रो दिन : कोशी टप्पुबाट फर्किएर बराह क्षेत्रको अवलोकन गर्न सकिन्छ । त्यसको साथै सप्तकोशी नदीको बाँधस्थललगायत अन्य क्षेत्रको अवलोकन र सोही दिन भेडेटारमा बसोबास ।
चौथो दिन : नाम्जे भिलेज, पानी ट्यांकी डाँडा, धनकुटा तथा नमस्ते झरनाको अवलोकन ।
पाँचौं दिन : पाख्रीबास गाउँको अवलोकन तथा ५ किलोमिटर दूरीमा रहेको हिले बजारको अवलोकन गर्दै काठमाडौं फर्कने ।
पाथीभरा दर्शन
ताप्लेजुङ जिल्लामा रहेको पाथीभरा मन्दिर हिन्दू धर्मालवम्बीहरूको प्रसिद्ध तिर्थस्थल हो ।
पहिलो दिन : काठमाडौंबाट काँकडभिट्टा
दोस्रो दिन : विभिन्न स्थानहरूको अवलोकन गर्दै कन्याम चिया बगानमा जाने र सोही क्षेत्रमा बसोबास गर्ने ।
तेस्रो दिन : आधा दिन चिया बगानको अवलोकन गर्ने । सो दिन अन्तुडाँडामा बासोबास गर्ने ।
चौथो दिन : अन्तु डाँडाबाट ६ घन्टाकोे सवारी यात्रापछि ताप्लेजुङ पुग्न सकिन्छ । सो दिन सोही स्थानमा बस्ने ।
पाँचौं दिन : ताप्लेजुङ बजार क्षेत्र, पाथीभरा मन्दिर क्षेत्रको दर्शनपछि सो दिन ताप्लेजुङमै बस्ने ।
छैटौं दिन : बिहानै काठमाडौंको लागि प्रस्थान ।
खप्तड टुर
सुदूरपश्चिमको रमणीय क्षेत्र खप्तडको लागि पनि पहिलो पटक टुर प्याकेज सार्वजनिक गरिएको छ । १२ जनाको समूहका लागि प्रतिव्यक्ति २५ हजार तोकिएको छ ।
पहिलो दिन : रात्रीबस सेवामार्फत काठमाडौंबाट धनगढी ।
दोस्रो दिन : धनगढीबाट डडेलधुरा ।
तेस्रो दिन : डडेलधुराबाट बझाङको लामातोला होमस्टे ।
चौथो दिन : लामातोलाबाट ७ घन्टाको पैदल यात्रापछि खप्तड क्षेत्र प्रवेश ।
पाँचौं दिन : खप्तड क्षेत्रको अवलोकन ।
छैटौं दिन : खप्तडबाट ७ घन्टाको पदयात्रा तथा १ घन्टाको सवारीको यात्रापछि डोटीको सिलगढी ।
सातौं दिन : सिलगढीबाट धनगढी
आठौं दिन : दिनभरी धनगढीका अन्य क्षेत्रहरूको अवलोकन तथा रात्रिमा काठमाडौं फर्कने ।
लुम्बिनी स्वर्गद्वारी टुर
काठमाडौंबाट लुम्बिनी क्षेत्र तथा प्युठानको स्वर्गद्वारीसम्मको यात्रा ६ दिनको हुनेछ ।
पहिलो दिन : काठमाडौंबाट लुम्बिनी रात्रि सेवामा ।
दोस्रो दिन : बिहानदेखि लुम्बिनीको भ्रमण गरेपश्चात पाल्पाको तानसेन होमस्टेमा बसोबास ।
तेस्रो दिन : गुल्मीको रिडी हुँदै तम्घास जाने । रेसुंगा क्षेत्रको अवलोकन
चौथो दिन : अर्घाखाँचीको सन्धीखर्क तथा सुपादेउराली हुँदै सन्धीखर्कमा बसोबास ।
पाँचौं दिन : प्युठानको स्वर्गद्वारी
छैटौं दिन : काठमाडौैं प्रस्थान
खर्च : प्रतिव्यक्ति १० हजार ५ सय रुपैयाँ
रारा ताल
राराताल जानको लागि ३ वटा प्याकेज लिन सक्ने गरी सार्वजनिक गरिएको छ ।
हवाई मार्गमार्फत
पहिलो दिन : काठमाडौं–नेपालगन्ज
दोस्रो दिन : नेपालगन्ज–ताल्चा विमानस्थल हुँदै ३ घन्टाको पैदल यात्रापछि रारा क्षेत्र
तेस्रो दिन : रारामा रहेको डाँफे रिसोर्टमा बसोबास तथा घुमफिर
चौथो दिन : ताल्चा विमानस्थलबाट नेपालगन्ज तथा नेपालगन्जबाट काठमाडौं फर्किने ।
खर्च : ३८ हजार रुपैयाँदेखि ४० हजार रुपैयाँसम्म
सडक मार्गबाट
पहिलो दिन : काठमाडौंबाट नेपालगन्ज ।
दोस्रो दिन : सुर्खेत, दैलेख हुँदै कालिकोटमा बसोबास
तेस्रो दिन : रारा क्षेत्र तथा मुगु पुगिन्छ । सो दिन डाँफे रिसोर्टमा बास ।
चौथो दिन : रारा तालको अवलोकन तथा भ्रमण बोटिङ गर्न सकिन्छ । सो दिन पनि सोही क्षेत्रमा बसोबास ।
पाँचौं दिन : ताल्चा विमानस्थलबाट नेपालगन्ज हुँदै काठमाडौं हवाई मार्गबाट आउन पनि सकिन्छ । साथै सोही रुटमार्फत काठमाडौं गाडीबाट आउन पनि सकिन्छ ।
No comments:
Post a Comment