निगमको दोस्रो विमान वैशाख १५ भित्र

४ जहाजमार्फत ९ गन्तव्यमा साताका ५० अन्तर्राष्ट्रिय उडान भर्ने

केदार दाहाल
काठमाडौं, १५ चैत – नेपाल वायुसेवा निगमले खरिद गरेको दोस्रो एयरबस ‘ए’ ३२०–२०० न्यारो बडी वैशाख १५ भित्र नेपाल आउने भएको छ । त्यसलगत्तै उसले भारतका थप २ गन्तव्यमा उडान भर्ने भएको छ । ३ वर्षपछि फागुन १५ यता निगमले नियमित काठमाडौं–दिल्ली उडान गरिरहेको छ । एयरबस आएपछि उसले बैंगलोर र मुम्बईमा उडान थप्नेछ । हाल जेट एयरवेज, एयर इन्डिया, इन्डिगो, स्पाइस जेट र भुटानको ड्रुक एयरले दिल्ली–काडमाडौं उडान भर्दै आएका छन् ।
निगमसँग अन्तर्राष्ट्रिय उडानका लागि २ वटा एयरबस ‘ए’ ३२०–२०० र २ वटा बोइङ–७५७ गरी ४ वटा जहाज हुनेछन् । यी जहाजमार्फत उसले ९ गन्तव्यमा साप्ताहिक ५० अन्तर्राष्ट्रिय उडान भर्नेछ । भारतका ३ सहित हङकङ, दोहा, बैंकक, दुबई, चीनको गोन्जाउ र क्वालालम्पुर उडान सुरु हुनेछ ।
वैशाख १५ सम्ममा एयरबसले निगमलाई जहाज हस्तान्तरण गर्ने प्रवक्ता रामहरि शर्माले जानकारी दिए । उनका अनुसार निगमले ४ वटा जहाजबाट दिल्ली १४, मुम्बई ३, बैंगलोर ३, हङकङ ३, बैंकक ३, गोन्जाउ ३, दुबई ७, दोहा ७, मलेशिया ७ वटा साप्ताहिक उडान गर्नेछ । अहिले दुबईमा साताका ४ वटा उडान भरेर बिस्तारै ७ वटा पु¥याउने लक्ष्य रहेको उनले बताए । अहिले सातामा ४ वटा उडान भइरहेको दोहामा पनि ७ वटा उडान पु¥याउने तयारी निगमको छ ।
निगमले जहाज खरिदका लागि सञ्चय कोषसँग १० अर्ब रुपैयाँ ऋण लिएको थियो । नयाँ आउने जहाज पनि १५८ सिट क्षमताको हो । हाल निगमले अन्तर्राष्ट्रिय उडानका लागि १९० सिटका बोइङ–७५७ प्रयोग गर्दै आएको छ ।

साप्ताहिक उडान
गन्तव्य    उडान संख्या
काठमाडौं–दिल्ली    १४
काठमाडौं–बैंगलोर    ३
काठमाडौं–मुम्बई    ३
काठमाडौं–दोहा    ७
काठमाडौं–हङकङ    ३
काठमाडौं–बैंकक    ३
काठमाडौं–गोन्जाउ    ३
काठमाडौं–दुबई    ७
काठमाडौं–क्वालालम्पुर    ७
जम्मा     ५०