केदार दाहाल
काठमाडौं, १६ मंसिर- उत्तरी छिमेकी चीनबाट नेपाल आउने पर्यटकको संख्या बढेसँगै नेपालमा उडान भर्ने एयरलाइन्स कम्पनी पनि थपिन थालेका छन् । सन् २०१५ जनवरीदेखि सिचुवान एयरलाइन्सले नेपालमा उडान गर्ने निश्चित भएको छ । उसले चीनका क्षेत्रीय तथा अन्तर्राष्ट्रिय गन्तव्यमा उडान भर्दै आएको छ ।
नेपालका लागि सिचुवानको जनरल सेल्स एजेन्ट (जीएसए) सोसाइटी ट्राभल्स सर्भिस प्रालिका अनुसार कम्पनीले पुस अन्तिमदेखि छेन्दु–ल्हासा–काठमाडौं उडान गर्ने भएको छ । सिचुवानले यो रुटमा दैनिक एउटा उडान गर्ने सोसाइटी ट्राभल्सका टुर अपरेसन प्रमुख चन्दन श्रीवास्तवले बताए ।
त्यस्तै, फेब्रुअरीदेखि हिमालयन एयरलाइन्सले ल्हासा–काठमाडौं उडान गर्ने तयारी गरिरहेको छ । हिमालयले तिब्बत एयरलाइन्ससँग सहकार्य गर्दैछ । उसले २ अर्ब ५० करोड रुपैयाँ लगानी गरी उडान थाल्ने पक्का भइसकेको छ । चीनबाट अहिले पनि एयर चाइना, चाइना इस्टर्न र चाइना साउदर्नले नेपाल उडान गरिरहेका छन् ।
नेपाल र चीन सरकारबीच गत वर्ष हवाई सम्झौता पुनरावोलकन भएको थियो, जसमा वार्षिक सिट क्षमता १ लाख ४५ हजारबाट बढाएर ५ लाख ५२ हजार ४ सय पु¥याइएको थियो । त्यसअघि सन् २००३ मा सम्झौता पुनरावोलकन भएको थियो । चीनसँग पहिलो हवाई सम्झौता सन् १९९७ मा भएको थियो । पहिले बेइजिङ, सांघाईबाट मात्र उडान भर्ने सम्झौता भएकोमा गत वर्ष कुनमिङ, छेन्दु र लासा थपिएका थिए ।
चीनबाट नेपाल भ्रमण गर्नेको संख्या उल्लेख्य रूपमा वृद्धि भएपछि एयरलाइन्स थपिने क्रम पनि बढेको हो । चीनबाट सन् २०१२ मा ७१ हजार ८ सय ६१ र २०१३ मा १ लाख १३ हजार १ सय ७३ पर्यटक नेपाल आएका थिए ।
चीनबाट आउनेको संख्या बढेपछि सिचुवान नेपालमा आकर्षित भएको हो । यसअघि नै कम्पनीका अध्यक्ष ली हाइयिङले अन्तर्राष्ट्रिय गन्तव्यअन्तर्गत नेपाल प्राथमिकतामा परेको बताएका थिए ।
सिचुवानले नेपालमा एयरबस ३२० सिरिजको जहाजमार्फत उडान गर्नेछ । सन् १९८६ देखि चीनको सिचुवानबाट क्षेत्रीय गन्तव्यमा उडान थालेको कम्पनीले २०१४ मा एसियाली एयरलाइन्समध्ये उत्कृष्ट अवार्ड जितेको थियो । २००७ देखि अन्तर्राष्ट्रिय गन्तव्यमा उडान सुरु गरेको सिचुवान अहिले हङकङ, मेलबर्न, भान्कुवर, सिड्नीलगायत गन्तव्य पुगेको छ । सिचुवालने विभिन्न गन्तव्यमा ९३ वटा एयरक्राफ्टमार्फत उडान गर्दै आएको छ ।
No comments:
Post a Comment