साझाका उपभोक्ता २ वर्षमा ६२ लाख

शिव बोहरा
काठमाडौं, १ वैशाख – बन्द भएपछि पुनः सञ्चालनमा आएको २ वर्षमा साझा यातायातले ६१ लाख ९३ हजार ४०६ जना यात्रुलाई यात्रा गराएको छ । उक्त यात्रुलाई टिकट बिक्री गरी साझाले ९ करोड १७ लाख ६ हजार ११ रुपैयाँ आम्दानी गरेको छ ।

उपत्यकाको २ रुटमा सञ्चालित साझा बसले दैनिक करिब ८४८४ यात्रीलाई यात्रा गराउँदै आएको छ । यसैलाई आधार मान्दा औसत मासिक २ लाख ५८ हजारभन्दा बढीले साझामार्फत सेवा लिने गरेको देखिन्छ । गत वर्ष साझा यातायातले २७ लाख २३ हजार ८४ भन्दा बढी यात्रुलाई यात्रा गराएर ३ करोड ९८ लाख ३ हजार १०४ रुपैयाँभन्दा बढी आम्दानी गरेको थियो ।
यो वर्ष साझाले आफ्ना बसलाई प्रविधि मैत्री बनाउने लक्ष लिएको साझा यातायातका प्रबन्धक महेन्द्रराज पाण्डेयले बताए । “साझाले यो वर्ष सबै बसमा बस ट्रयाकिङ सिस्टम लागू गर्ने तयारी गरेको छ,” पाण्डेयले भने । उनका अनुसार उक्त सिस्टममा साझाका बस सञ्चालन हुने रुटको नक्सा हुनेछ । यो सिस्टममा आधारित हाम्रो साझा एपमार्फत साझाका ट्रयाकिङ सिस्टममा रहेका बस कुन ठाउँबाट कुन ठाउँमा जाँदै छ भन्ने प्रष्ट रुपमा मोबाइल प्रयोगकर्ताले देख्न सक्ने छन् । त्यस्तै साझाले पीए सिस्टमसमेत परीक्षणका रूपमा सुरु गरेको छ । “पीए सिस्टमले हरेक स्टेसन आउनु करिब १ मिनेट अघि आउँदै गरेको स्टेसनको जानकारी दिने छ,” पाण्डेयले भने, “जसले यात्रुलाई कुन ठाउँ आइपुगे भन्ने समस्या रहँदैन ।” साझाले ई–टिकेटिङ र साझा प्रिपेड कार्ड सिस्टमसमेत यसै वर्ष लागू गर्ने योजना बनाएको छ ।

२०५८ माघ ११ को मन्त्रिपरिषद् बैठकले खारेज गरेको साझा यातायात १ वर्षपछि अदालतले मन्त्रिपरिषद्को निर्णय नै खारेज गरेपछि धङधङ मात्र बाँकी थियो । त्यसपछि साझा सहकारीमार्फत २०७० वैशाख १ गतेदेखि १६ नयाँ बस ल्याइ सञ्चालनमा आएको थियो । साझाले हाल २ रुट नयाँ बसपार्कदेखि टिचिङ हुँदै लगनखेल र स्वयम्भूदेखि कलंकी, त्रिपुरेश्वर, जमल, ज्ञानेश्वर हुँदै एयरपोर्टसम्म बस सञ्चालन गर्दै आएको छ । सुरुमा दुवै रुटमा समान ८/८ बस सुचारु गरेको भए पनि केही महिनापछि यात्रुको चाप बढेको भन्दै साझाले एयरपोर्ट रुटबाट २ बस झिकेर बसपार्क रुटमा थपेको थियो ।
उपत्यकामा सञ्चालित सार्वजनिक यातायात मनपरी ढंगले सञ्चालन भइरहेको अवस्थामा हरेक क्षेत्रमा प्रविधि तथा सेवा सुविधामा साझाले राम्रो उदाहरण प्रस्तुत गरिसकेको छ । हाल साझाले १८ बटा बसमार्फत यात्रुलाई सेवा दिँदै आएको छ । जहाँ यात्रुहरूको सुरक्षाका लागि सीसीटीभी, मनोरञ्जनका लागि डिस्प्ले टिभी र इन्टरनेट सुविधाका लागि नेपाल टेलिकमसँगको सहकार्यमा वाइफाईलगायतका सुविधाहरू उपलब्ध छन् ।

साझाका बसहरू काठमाडौंका अन्य रुट र उपत्यका बाहिरसमेत सञ्चालनको माग उपभोक्ता तथा विभिन्न संघसंस्थाबाट आइरहेको साझाका प्रबन्धक महेन्द्रराज पाण्डेयले बताए । रुट थप्नका लागि बस आवश्यक पर्छ त्यसका लागि साझेदारको खोजी भइरहेको साझाले जनाएको छ । साझाको मुख्य उद्देश्य नाफाभन्दा पनि उपभोक्तालाई सेवा पु¥याउनु रहेको पाण्डेयको भनाइ छ । उनले भने, “साझाले सिस्टमको विकास गर्न खोजेको हो । यात्रुहरूलाई नम्र र सभ्य व्यवहार गर्नुपर्छ भन्ने मान्यता साझाले राख्छ ।”