निलम्बनविरुद्ध निरौला सर्वोच्चमा

" पर्यटन बोर्डमा नीतिगत अनियमितता भएको देखिन्छ : अख्तियार "

काठमाडौं, १५ कात्तिक । नेपाल पर्यटन बोर्ड सञ्चालक समितिले निर्देशक पदसमेत नरहने गरी निलम्बित गरेपछि कायम–मुकायम कार्यकारी निर्देशक सुवास निरौलाले त्यसविरुद्ध सर्वाेच्च अदालतमा मुद्दा दायर गरेका छन् । उनले प्रक्रिया नपु¥याइ बसेको सञ्चालक समितिको बैठकले गरेको निर्णय मान्य नहुने जनाउँदै शुक्रबार सर्वोच्चमा मुद्दा दायर गरेका हुन् । उनले सरकारलाई विपक्षी बनाएका छन् । निरौलाले अदालतमा दायर गरेको यो पन्ध्रौं मुद्दा हो ।  
निरौलाले सदस्य सचिवविना बसेको बैठकले गरेको निर्णय नमान्ने बताउँदै पद बचाउन शुक्रबार अदालतको ढोका ढक्ढक्याउन पुगेका छन् । निरौला कामु सीईओको हैसियतले सञ्चालक समितिमा सदस्य सचिव थिए । उनलाई नै निलम्बित गर्ने भएपछि निरौलालाई बैठकमा बोलाइएको थिएन ।
बोर्ड समितिको बिहीबार बसेको बैठकले व्यवस्थापिका(संसद् सार्वजनिक लेखासमितिको निर्देशनअनुसार निरौलालाई बोर्डमा आर्थिक अनियमितिता गरेको आरोपमा निलम्बित गरेको थियो । गत कात्तिक ५ गते निरौलालाई लेखासमितिले संस्कृति, पर्यटन तथा नागरिक उड्डयन मन्त्रालयमार्फत निरौलालाई निलम्बन गर्न निर्देशन दिएको थियो ।
बोर्ड सञ्चालक समितिले निर्णय गरेपछि मन्त्रालयले बिहीबार बोर्डको कार्यालयमा पत्र बुझाउन मन्त्रालयले कर्मचारी पठाएको थियो । निरौलाले पत्र लिएर गएका कर्मचारीलार्इ ‘म पत्र बुझ्दिन’ भन्दै हकारेका थिए । त्यसपछि कर्मचारी पत्र लिएर मन्त्रालयमा नै फर्किएका थिए । मन्त्रालयका सचिव सुरेशमान श्रेष्ठका अनुसार निरौलाले पत्र नबुझे पनि बोर्डको कार्यालयमा जानकारी गराइसकेकोले निरौलाले पत्र नलिए पनि केही फरक नपर्ने बताए ।  

‘ नीतिगत अनियमितता भएको देखिन्छ’ : अख्तियार  

बिहीबार मात्र निलम्बनमा परेका पर्यटन बोर्डका कायम मुकायम प्रमुख कार्यकारी अधिकृत सुवास निरौलालाई छिट्टै कारबाहीको दायरामा ल्याउने अख्तियार दुरुपयोग अनुसन्धान आयोगले जनाएको छ ।
करौडौं रुपैयाँको अनियमितताको आरोप लागेका निरौलालाई गत साता मात्र संसद्को सार्वजनिक लेखासमितिले निलम्बन गरी काराबाही गर्न निर्देशन दिएको थियो । निरौलाको विषयमा पहिलो पटक मुख खोलेको अख्तियारले भ्रष्टाचारीलाई कुनै पनि हालतमा नछाड्ने भन्दै अनुसन्धान अन्तिम चरणमा पुगेको र छिट्टै कारबाहीको दायरामा ल्याउने आफ्नो अफिसियल टुईटर ह्यान्डलमार्फत जानकारी दिएको छ ।
टुईटरमा अख्तियार प्रमुख लोकमानसिंह कार्कीले बोर्डमा नीति गत भ्रष्टाचार भएको उल्लेख गर्दै अनुसन्धान अन्तिम चरणमा पुगेको बताएका छन् । “नेपाल पर्यटनमा निरौलाले नीतिगत अनियमितता गरेको भेटिएको छ,” उनले भनेका छन् ।