वायुसेवा निगममा धमाधम आफन्तलाई जागिर

५५ जनालाई करार नियुक्ति/थप २०० लाई राख्ने तयारी

केदार दाहाल

काठमाडौं, ५ साउन  : राष्ट्रिय ध्वजाबाहक नेपाल वायुसेवा निगममा फेरि राजनीतिक दबाबमा कर्मचारी नियुक्ति सुरु भएको छ । निगम व्यवस्थापनले बिनाप्रतिस्पर्धा राजनीतिक दबाब र आफन्तलाई धमाधम जागिरमा भर्ती गरिरहेको खुलासा भएको हो । निगममा दक्ष जनशक्ति अभाव रहे पनि अहिले तल्ला तहमा कर्मचारी भर्ना गरिएको छ ।
निगम स्रोतका अनुसार हाल विभागीय मन्त्रालय तथा राजनीतिक नेतृत्वको दबाबमा ग्राउन्ड सर्पोट विभागमा २१, कस्टमर सर्भिस विभागमा ११, अपरेसन विभागमा १३, कमर्सियल विभागमा ३ र फाइनान्स विभागमा ५ जना बिनाप्रतिस्पर्धा नियुक्त गरिएको छ । त्यस्तै, कर्पोरेट विभाग, इन्जिनियरिङ विभाग, जनरल सर्भिस एन्ड प्रोपर्टी व्यवस्थापनलगायतका विभागमा पनि १२ जना जतिलाई सिधै नियुक्ति दिइएको छ । निगममा ११ विभाग छन् ।
तर, निगमका प्रबन्ध निर्देशक सुगतरत्न कंसाकारले भने सिधै नियुक्त गरिएको अस्वीकार गरेका छन् । “एयरपोर्टमा अति नै आवश्यक परेकोले केही नियुक्ति गरिएको हो, अन्यत्र छैन,” उनले भने । अत्यावश्यक काम रोक्नु हुँदैन भनेर ग्राहक सेवासँँग सम्बन्धित विभागमा नियुक्ति गरिएको उनको तर्क छ । “केही दिनमै गोरखापत्रमा खुला प्रतिस्पर्धाका लागि दरखास्त आह्वान गर्ने तयारी भइरहेको छ,” उनले भने ।
कंसाकार पर्यटनमन्त्रीमा कृपासुर शेर्पा नियुक्त भएलगत्तै निगमको प्रबन्ध निर्देशकमा नियुक्त भएका हुन् । निगममा हाल अध्यक्ष शिवशरण न्यौपाने र उनले राजनीतिक दबाबमा विभिन्न पार्टीका कार्यकर्तालाई निगममा धमाधम नियुक्त गरिरहेको स्रोतले जनाएको छ । निगम उच्च स्रोतका अनुसार कंसाकार नियुक्त भएयता मात्र ५५ भन्दा बढी कार्यकर्ता विभिन्न विभागमा नियुक्त भइसकेका छन् ।
निगममा २ हजार ३ सय दरबन्दी छ तर हाल १ हजारमात्र कर्मचारी छन् । कर्मचारी अभाव भन्दै झन्डै २०० भन्दा बढीलाई करारमा नियुक्त गर्ने प्रक्रियासमेत व्यवस्थापनले अघि बढाइरहेको खुल्न आएको छ ।
विभिन्न राजनीतिक दलसहित निगमका अध्यक्ष शिवशरण न्यौपानेलगायतले समेत आफन्तलाई जागिर खुवाउन दबाब दिएपछि कंसाकार बाध्य भएको बुझिएको छ । न्यौपानेलाई मन्त्रिपरिषद् बैठकले हटाउने निर्णय गरे पनि गत साता सर्वोच्चले अन्तरिम आदेश दिएपछि पुनः निगममै फर्किएका छन् ।
प्राविधिक तथा पाइलट अभावमा नयाँ जहाज नै ग्राउन्डेड भइरहेका बेला प्रशासन सेवातर्फ करारमा कर्मचारी नियुक्त गरिएको हो । प्रतिस्पर्धाबाट दक्ष जनशक्ति लिएर व्यवस्थापन सुधार गनुपर्ने समयमा पुनः पुरानै शैलीमा नियुक्ती दिइनु गलत भएको निगमकै अधिकारी बताउँछन् ।
अधिकारीहरूका अनुसार नयाँ जहाज खरिद गर्दाको सञ्चय कोषको १० अर्ब रुपैयाँ ऋण तिर्न नसक्ने अवस्थामा पुगेको निगमलाई पाइलट र इन्जिनियरको भने आवश्यकता छ । “यहाँ धमाधम प्रशासनतर्फ बिनाप्रतिस्पर्धा भर्ती गरिएको छ, निगममा पुनः राजनीतिक हस्तक्षेप भित्रिएको छ,” निगम स्रोतले भन्यो ।
निगम उच्चतहका कर्मचारीसमेत कंसाकारको कदमसँग सहमत छैनन् । “कंसाकारलाई राम्रो गर्छन् भनेर ल्याइएको हो तर मन्त्री र विभिन्न राजनीतिक दलसम्बद्ध विभिन्न नेतृत्वका कर्मचारी भर्ती गरिने काम भएको छ,” निगमका एक उच्च अधिकारीले भने, “यसरी मन्त्री र अध्यक्षका कार्यकर्ता भर्ती गर्दै जाने हो भने निगम हिजोको जस्तै हुन्छ ।” खुला प्रतिस्पर्धामा नियुक्त गरिनुपर्नेमा सिधै तोक आदेश लगाएर करारमा नियुक्त दिने काम भइरहेको उनको भनाइ छ ।
एकपटक निगमको महाप्रबन्धक र कार्यकारी अध्यक्षसमेत भइसकेका कंसाकारले पुनः नियुक्ति पाएलगत्तै मुख्य ध्यान निगमको फितलो व्यवस्थापन सुधार्न केन्द्रित हुने बताएका थिए । कंसाकार राजनीतिक नियुक्तिमा आएकाले उनीमाथि दलका कार्यकर्ता निगममा नियुक्त गर्न चर्को दबाब परेको स्रोतको दाबी छ ।
यसअघिका पर्यटनमन्त्री भीम आचार्य र दीपकचन्द्र अमात्यले राजनीतिक नियुक्ति गर्न तत्कालीन प्रबन्ध निर्देशक मदन खरेललाई दबाब दिँदा विवाद आएको थियो । मन्त्रीको चर्को दबाबपछि खरेलले राजीनामा दिएका थिए । आचार्य मन्त्री हुँदा नियुक्त गरिएका सयभन्दा बढी कर्मचारीलाई अख्तियार दुरुपयोग अनुसन्धान आयोगको निर्देशनमा बर्खास्त गरिएको थियो ।