होम › कर्पोरेट › ‘एक्सचेन्ज’ कारोबारमा पाँच गुणा गिरावट ‘एक्सचेन्ज’ कारोबारमा पाँच गुणा गिरावट

गाडीको सट्टापट्टा गर्ने व्यवसायीहरूले अस्वाभाविक मूल्यवृद्धि गरेपछि कारोबार प्रभावित बनेको छः नाडा

काठमाडौं, १० वैशाख

पछिल्लो समय निकै फस्टाउन थालेको चार पाङ्ग्रे गाडीको साटफेर (एक्सचेन्ज) व्यवसाय अहिले संकटमा छ । व्यवसायीहरूका अनुसार पछिल्ला महिनामा यस्तो कारोबार झन्डै ५ सय प्रतिशतले घटेको छ । पुराना गाडी खरिदकर्तालाई कर्जा सुविधा दिँदै आएका बैंकहरूले कर्जामा कडाइ गर्दै लगेपछि यो व्यवसाय प्रत्यक्ष प्रभावित भएको हो ।

बैंकहरूले यस्तो शीर्षकको कर्जा प्रवाहमा रोक लगाएका छन् । सरकारले बढाएको करका कारण पनि पुराना गाडी किनबेच हुने क्रम घटेको नेपाल अटोमोवाइल डिलर एसोसिएसन (नाडा) ले जनाएको छ ।

गाडी कम्पनीको समेत राम्रो आम्दानीको स्रोत बनिसकेको ‘एक्सचेन्ज’ कारोबार तीव्र रूपमा घटेपछि व्यवसायी चिन्तित भएका छन् ।

नेपालमा ‘एक्स्चेन्ज’ व्यवसाय सुरु भएको एक दशक पनि पूरा भएको छैन । यो व्यवसाय मुख्यगरी वर्कसप र ब्रान्डेड गाडीका विक्रेताले गर्दै आएका थिए । “केही वर्षअघिमात्र यस्तो कारोबार फस्टाएको भए पनि पछिल्लो समय पूर्णरुपमा बन्द भएको छ,” नाडा अध्यक्ष सौरभ ज्योतिले भने ।

सरकारी तथ्यांकले पनि गाडीको सट्टापट्टा घटेको देखाएको छ । नयाँ गाडी बिक्रीमा उच्च गिरावट आइरहेका बेला पुराना गाडीको नामसारी दर्तामा पनि उल्लेख्य कमी आएको यातायत व्यवस्था कार्यालय एकान्तकुनाले जनाएको छ । अघिल्लो वर्षमा दैनिक १ सयदेखि १ सय ५० को संख्यामा नामसारी हुने गरे पनि हाल यो संख्या घटेर २० देखि ३० मा सीमित भएको कार्यालयका शाखा अधिकृत विष्णु पौडेलले जानकारी दिए ।

पुराना गाडीको नामसारी र दर्तामा झन्डै ५ सय प्रतिशतले कमी आएको छ । हाल आएका दर्ता पनि धेरैजसो नातेदारको नाममा बढी भएको पौडेलले बताए ।

दोस्रो बजारमा गाडीको किनबेच घट्नुको अर्को कारण अस्वाभाविक मूल्यवृद्धि पनि हो । कारोबार थोरै हुँदा पनि ‘एक्सचेन्ज’ गर्नेले अस्वाभाविक मूल्य बढाएकाले कारोबार घटेको अध्यक्ष ज्योति बताउँछन् । “विक्रेताहरूले धेरै रकम माग गर्न थालेपछि यतिबेला एक्सचेन्जमा प्रभाव परेको छ,” उनले भने ।

पछिल्लो समय २० लाखभन्दा बढी कारोबार बैंकमार्फत गर्नुपर्ने प्रावधानले पनि ‘एक्सचेन्ज’ व्यवसायलाई असर पारेको ज्योतिले बताए । २० लाखसम्मको कारोबार नगदमा भन्दा ‘डिलिङ’ बाट हुने भएकाले पनि यस्तो व्यवसाय बन्दै हुने अवस्थामा पुगेको उनको अनुभव छ ।

नयाँ तथा महँगो गाडी खरिद गर्न नसक्नेहरूका लागि ‘एक्सचेन्ज’ सजिलो माध्यम भए पनि पछिल्लो समय पुराना गाडी विक्रेताले नै महँगो दर कायम गरेका छन् । विक्रेताहरूले गाडी खरिद गरेको वर्ष तथा पुर्जाहरूका आधारमा रकम तोक्ने तथा लिने गरेका छन् ।

गाडी साटफेर गर्ने उद्देश्यले खोलिएका सबै ‘एक्सचेन्ज’ व्यवसाय मारमा परेको ड्राइभ इन कार एक्सचेन्ज सेन्टरका प्रवन्धक लेखनाथ न्यौपानेले बताए ।

नयाँ गाडीको बिक्रैमै कमी आएपछि ‘एक्सचेन्ज मार्केट’ पनि ओरालो लाग्नु स्वाभाविक भएको गोल्छा समूहका सुनील क्षेत्रीको भनाइ छ । “एक्सचेन्ज बजार प्रभावित हँुदा मध्यम वर्गका उपभोक्ता मारमा परेका छन्,” उनले भने ।

बजारको राम्रो सम्भाव्यता देखेर गाडी कम्पनीहरूले पनि ‘एक्सचेन्ज मेला’ सञ्चालन गर्दै आएका छन् । सबैजसो गाडीका अधिकृत विक्रेताहरूले नयाँ गाडी बिक्रीसँगै ‘एक्सचेन्ज’ कारोबारसमेत गर्दै आएका छन् ।