१५ मे २०११, १०:५२ बजे
काठमाडौं, ३१ वैशाख
विक्रेताहरूले चालू आर्थिक वर्षमा आयात गरेका मध्ये ५० प्रतिशतभन्दा बढी सवारी साधन बिक्री नभई थन्किएका छन् । नेपाल अटोमोबाइल डिलर एसोसिएसन (नाडा) का अनुसार अघिल्ला वर्ष यो सिजनमा १५ प्रतिशत मात्र सवारीसाधन ‘स्टक’ रहन्थे ।
यसवर्ष चारपाङ्ग्रेभन्दा मोटरसाइल बढी ‘स्टोर’मा थन्किएका छन् । सरकारले बढाएको करका कारण पछिल्लो समय सवारी आयात पनि क्रमशः घट्दै गएको छ ।
चालू आवको दोस्रो चौमासिकसम्मको तथ्यांकका आधारमा १ लाख ४ हजार ४ सय ३८ सवारी साधन आयात भएकोमा ४९ हजार ४ सय १० सवारी साधनमात्र बिक्री भएका छन् । गत आवमा २ लाख १ हजार ७ सय ८७ सवारी आयात भएका थिए ।
“आयात पनि यो वर्ष झन्डै ४५ प्रतिशतले घट्ने निश्चित भएको छ,” नाडा अध्यक्ष सौरभ ज्योति भन्छन्, “त्यसमा पनि ५० प्रतिशत सवारी स्टक रहनु भनेको अटोमोबाइल क्षेत्रको लगानी धराशायी भएको अवस्था हो । अब यो क्षेत्रलाई जोगाउने कि छाड्ने भन्ने सरकारको हातमा छ ।” प्रायः गाडी विक्रेताले अर्डरअनुसार मात्र गाडी आयात गर्ने भएकाले यो वर्ष मोटरसाइकल विक्रेताहरूले बढी घाटा सहनुपरेको ज्योतिको भनाइ छ ।
अघिल्लो वर्ष १ लाख ६८ हजार ७ सय ७ मोटरसाइकल आयात भएका थिए । चालू वर्षको दोस्रो चौमासिकसम्म आइपुग्दा ८६ हजार ६ सय ५५ मात्र आयात भएका छन् । तीमध्ये ४२ हजार १ सय ७१ मात्र बिक्री भएका छन् । अघिल्लो वर्ष १० देखि १८ प्रतिशतसम्म मात्र मोटरसाइकल ‘स्टक’ रहेको जानकारी ज्योतिले दिए । त्यसैगरी १३ हजार ३ सय ४० गाडी आयात भएकोमा ७ हजार २ सय ३९ मात्र यातायत व्यवस्था विभागमा दर्ता छन् ।
ज्योति समूहले बिक्री गर्दै आएको हिरो होन्डा र होन्डा मोटरसाइकल मात्र झन्डै १२ हजारको हाराहारीमा ‘स्टक’ छन् । ‘अघिल्लो वर्ष १ हजारदेखि २ हजारसम्म स्टक रहन्थे,” उनले भने ।
गोल्छा अर्गनाइजेसन प्रालिले बिक्री गर्र्दै आएको बजाजका मोटरसाइकल पनि अहिले ८ हजार ५ सयभन्दा बढी ‘स्टक’मा छन् । “बजाजको बाइक बिक्री गर्न थालेपछिको यो हाम्रो पहिलो अनुभव हो,” प्रबन्ध निर्देशक शेखर गोल्छाले भने, “अघिल्लो वर्ष एकाध मोडेलका बाइकमात्र स्टक रहन्छे, अहिले सबै मोडेल थन्किएका छन् ।”
त्यस्तै, लक्ष्मी इन्टरकन्टिनेन्टल प्रालिको लक्ष्मी हुन्डाईले पनि आफ्नो बिक्रीमा ५० प्रतिशत गिरावट आएको बताएको छ । “अहिले नै यति स्टक छ भन्ने गणना गरेका छैनौं तर बिक्रीमा ५० प्रतिशतले गिरावट आएको छ,” प्रालिका रुपेश भट्टले भने ।
चालू आवको दोस्रो चैमासिकसम्मको स्टक
नाम आयात दर्ता स्टक
मोटरसाइकल ८६,६५५ ४२,१७१ ४४,३६६
गाडी १३,३४० ७,२३९ ६,१०
No comments:
Post a Comment