निगमले ल्यायो साढे ५ लाख लिटर हवाई इन्धन

काठमाडौं, १३ कात्तिक – इन्धन अभाव चुलिएपछि नेपाल वायुसेवा निगमले हालसम्म भारतको कोलकाताबाट ५ लाख ५० हजार लिटर हवाई इन्धन ल्याएको छ । भारतीय नाकाबन्दीका कारण आन्तरिक उडानमै समस्या पर्न थालेपछि दसैंअघि सरकारले निगमलाई जहाजमार्फत हवाई इन्धन ल्याउन निर्देशन दिएको थियो ।
निगमले बोइङ ७५७ को एसीबी जहाजमार्फत इन्धन ल्याएको प्रवक्ता रामहरि शर्माले बताए । “उडान नियमित राख्न र दसैंका बेला धेरै यात्रुलाई सेवा दिन कोलकाताबाट चार्टर उडान गरी हवाई इन्धन ल्याएका हौं,” उनले भने ।
निगमले हालसम्म नेपाल आयल निगमका लागि १७ वटा चार्टर फ्लाइट गरी ३ लाख ७४ हजार लिटर हवाई इन्धन ल्याएको छ । यो तेल आयल निगममार्फत अन्य एयरलाइन्सलाई उपलब्ध गराइँदै आउकोछ । निगमले आफ्नो आन्तरिक उडान सुचारु गराउन हालसम्म ८ वटा चार्टर फ्लाइटमार्फत १ लाख ७६ हजार लिटर हवाई इन्धन ल्याएको छ । “निगमले तेल ल्याएपछि सबै एयरलाइन्सले दसैंमा सेवा दिन सकेका हुन्,” शर्माले भने ।

निगमले बोइङ ७५७ को प्रत्येक उडानबाट ३६ टन हवाई इन्धन ल्याउने गरे पनि एउटा उडानका लागि जहाजलाई ८ टन इन्धन आवश्यक पर्छ । ६ टन टं्याकमै स्टक राख्नुपर्ने भएकोले २२ टन तेलमात्र खन्याउने गरेको छ । यसरी ल्याइएको इन्धन आयल निगमको स्टोरेज ट्यांकमा जम्मा गर्ने गरिएको शर्माले बताए । कोलकाताको उडान ४५ मिनेटको मात्र हुने र काठमाडौंको तुलनामा हवाई इन्धन सस्तो भएकाले त्यहीँबाट चार्टर गरी ल्याइएको हो ।

उता, संस्कृति, पर्यटन तथा नागरिक उड्डयन मन्त्रालयले दैनिक ५ उडान गरी तेल ल्याउन निर्देशन दिए पनि निगमले भने ३ उडानमात्रै गर्ने तयारी गरिरहेको छ । उसले अहिले २ वटा चार्टर उडान गरी तेल ल्याइरहेको छ । परिस्थिति र आवश्यकताअनुसार यस्ता चार्टर उडान थप्दै जाने तयारी गरिएको शर्माले बताए ।
मन्त्रालयका सचिव दिनेश थपलियले ५ वटा चार्टर उडान गर्न खोजिरहे पनि केही प्राविधिक समस्याका कारण सम्भव नभएको बताए । निगमका बोर्ड अध्यक्षसमेत रहेको थपलियाले केही दिनमै थप उडान गरी हवाई इन्धन बढाइने जानकारी दिए ।
इन्धन अभाव भएपछि आयल निगमले नेपाल उडान भर्ने सबै अन्तर्राष्ट्रिय एयरलाइन्सलाई असोज १२ देखि तेल दिन रोकेको छ । नेपालमा तेल भर्न नपाउने भएपछि अधिकांश एयरलाइन्सले वैकल्पिक व्यवस्था गरिसकेका छन् । उनीहरूले दिल्ली, लखनउ, बैंकक, बंगलादेशलगायत नजिकका विमानस्थलमा ‘टेक्निकल ल्यान्डिङ’ गराएर तेल भरिरहेका छन् । कतार एयरवेजले वाइड बडी जहाजमार्फत उडान गर्न थालेको छ । निगमले आफ्ना नियमित उडानमा रहेका ४ वटा जहाजलाई पनि ‘टेक्निकल ल्यान्डिङ’ गराएर तेल ल्याउने क्रम जारी राखेको छ ।