चिनियाँ चार जहाज चाँडै ल्याइने , पुस दोस्रो साता आइपुग्ने

काठमाडौं : नेपाल वायुसेवा निगम (नेवानि)ले ४ वर्षदेखि खरिद गर्ने तयारी गरिरहेको चिनियाँ जहाज पुस दोस्रो साता आइपुग्ने भएको छ । यसअघि निकै तामझामका साथ जहाज ल्याउने गरेको नेवानिले यसपटक भने ४ थान चिनियाँ जहाज भने चुपचाप ल्याउने तयारी गरेको छ । 

निगमले दुई वर्षअघि नै अनुदानका दुई चिनियाँ जहाज भने नेपाल ल्याइसकेको छ । “मन्त्रालयले एक महिनाअघि नै जहाज खरिद प्रक्रिया अगाडि बढाउन पत्र पठाएको छ र सोहीबमोजिम हामी लागिरहेका छौं,” निगमका महाप्रबन्धक सुगतरत्न कंसाकारले भने ।

गत महिना संस्कृति, पर्यटन तथा नागरिक उड्डयनमन्त्री जीवनबहादुर शाहीले चिनियाँ जहाज खरिद प्रक्रिया टुंग्याउन दिएको निर्देशनसँगै तयारीमा जुटेको निगमले आगामी पुस दोस्रो साताभित्र एमए–६० जहाज नेपाल ल्याइसक्ने योजना बनाएको छ । 

नेपाल सरकार र चीन सरकारबीचको कूटनीतिक सम्बन्धसँग जहाज खरिद प्रक्रिया जोडिन पुगेपछि सरकारले जुनसुकै हालतमा जहाज ल्याउने योजना बनाएको थियो ।

“चिनियाँ जहाज आवश्यकता भन्दा पनि बाध्यता भएको छ, पुस दोस्रो साता पहिलो जहाज काठमाडौं आउनेछ,” निगमका एक उच्च अधिकारीले भने ।

बाँकी ३ जहाज आगामी वैशाखसम्ममा ल्याइसक्ने योजना निगमले बनाएको छ । तर, कंसारकाले भने मिति तय नभएको तर दुई वटा जहाज छिटै आउने बताए । 

नेपालले खरिद गर्ने भनेको चिनियाँ जहाज एभिक इन्टरनेसनल होल्डिङ कम्पनीले तयार गरिसकेको र ७० प्रतिशत रकमसमेत नेपालले पठाइसकेकोले जहाज जसरी पनि ल्याउनैपर्ने अवस्थामा निगम पुगेको स्रोतको भनाइ छ ।

निगमले जहाज ल्याएपछि कुन–कुन स्थानमा उडाउने भन्ने विषयमा उडान तालिकासमेत तयार पार्न थालेको स्रोतको दाबी छ । गत फागुनमा मन्त्रालयले जहाज ल्याउने निर्णय गर्न मन्त्रिपरिषद्मा पठाएको प्रस्तावमा विवाद आएको थियो ।

मन्त्रिपरिषद् अन्तर्गतको समितिले मन्त्रीस्तरीय निर्णयले नै काम गर्न सक्ने अवस्था रहेको विषय किन मन्त्रिपरिषद् पठाएको भनेर मन्त्रालयमा पटक–पटक ताकेता गरेको थियो । 

एउटा एमए–६० र तीन वटा वाई–१२ ई जहाज खरिदका लागि मन्त्रिपरिषद्मा प्रस्ताव लगिएको थियो । दुई वर्षअगाडि नै चीनले एउटा एमए–६० र एउटा वाई–१२ ई जहाज अनुदानमा दिएको थियो ।

६ वटा चिनियाँ जहाज ६ अर्ब ६७ करोड १० लाख रुपैयाँ अनुदान तथा सहुलियत ऋणमा किन्न निगमलाई एक्जिम बैंकमार्फत ऋण उपलब्ध गराइएको हो । उक्त रकममध्ये २ अर्ब ९४ करोड १० लाख रुपैयाँ एमए–६० र एउटा वाई–१२ ई अनुदानमा लिन उपयोग गरिने सम्झौता भएको थियो भने बाँकी ३ अर्व ७२ करोड ८० लाख रुपैयाँमा एउटा एमए ६० र तीनवटा वाई १२ ई जहाज ऋणमा खरिद गर्ने गरी ४ वर्षअघि सम्झौता भएको थियो । 

निगमको मागमा चिनियाँ पक्ष सकारात्मक 

जहाज निर्माता कम्पनीनिगमले राखेका केही मागहरू सम्बोधन गर्नसमेत तयार भएको छ । चिनियाँ पक्षले निगमलाई झन्डै १ अर्ब रुपैयाँ खर्च गरेर ह्यांगर निर्माण गर्न पनि तयार भएको मन्त्रालय स्रोतले जानकारी दिएको छ ।

साथै चिनियाँ पक्ष स्पेयर पार्ट्स र पाइलटको समस्या समाधान गर्नसमेत तयार भएको छ ।

निगम व्यवस्थापनले चिनियाँ जहाज उडाउँदा हुने घाटा चिनियाँ पक्षले बेहोर्नुपर्ने, जगेडा सामान १० वर्षसम्म निःशुल्क उपलब्ध गराउनुपर्ने, जहाजसम्बद्ध नियम सबै चिनियाँ भाषाको सट्टा अंग्रेजी भाषामा लेखिएको हुनुपर्ने, चालक दलको तालिम खर्च कटौती र बिमा रकम कम हुनुपर्ने एवं जहाजले बोक्ने तौल बढी हुनुपर्ने सर्त पूरा भएमात्र बाँकी जहाज ल्याउने सर्त राखेको थियो ।