आन्तरिक उडानमा डेढ दर्जन बिमान थपिँदै, निजी कम्पनीले १३ वटा थप गर्ने

काठमाडौं : स्वदेशी वायुसेवा कम्पनीहरूले यसै वर्षभित्र आन्तरिक उडानका लागि डेढ दर्जनभन्दा बढी विमानहरू थप्ने भएका छन् । सरकारी स्वामित्वको नेपाल वायुसेवा निगमले ४ वटा चिनियाँ जहाज थप्ने प्रक्रिया सुरु गरिसकेको छ भने निजी क्षेत्रका चार एयरलाइन्सले १३ वटा विमान थप्ने प्रक्रिया सुरु गरेका छन् ।  

यती एयरलाइन्सले जेटस्ट्रिम विमानहरू विस्थापन गरेर एटीआर–७२ विमान ल्याउने योजनाअन्तर्गत ४ वटा जहाज खरिद गर्नका लागि मन्त्रालयमा प्रस्ताव गरेको छ । निजी क्षेत्रकै गोमा एयरले १ जहाज खदिरको अनुमति लिइसकेको छ र सिम्रिक एयरलाइन्सले दुइटा जहाज केही समय अगाडि मात्र थपेको छ  ।

सिम्रिकले ४ वटा स्काई ट्रक ल्याउने प्रक्रियासमेत सुरु गरेको छ । श्री एयरलाइन्सले पनि अब हेलिकप्टर सेवाबाट जहाज उडान सुरु गर्दैछ । कम्पनीले अनुमति लिएर २ वटा जहाज खरिद प्रक्रियासमेत अगाडि बढाइसकेको छ ।

उडान अनुमति (एओसी) को प्रक्रिया अन्तिम चरणमा रहेकाले नागरिक उड्डयन प्राधिकरणबाट अनुमति पाउने बित्तिकै २ वटा जहाज नेपाल ल्याउने श्री एयरलाइन्सका प्रवन्ध निर्देशक सुधीर मित्तलले जानकारी दिए ।

जहाज ल्याउने बित्तिकै एयरलाइन्सले ५० सिट क्षमताको क्यानडियन कम्पनी बम्बाडियरको जेट सीआरजे–२०० सिरिजको जहाज खरिद गरेर नेपाल ल्याउने तयारी रहेको मित्तलले बताए । 

यती एयरलाइन्सले बुद्ध एयरले उडान गरिरहेको एटीआर जस्तै सिरिज ल्याउने प्रक्रिया सुरु गरेको छ । यतीले ७२ सिट क्षमताका ४ वटा जहाज ल्याउने तयारी गरेको हो । यतीले हाल जेट स्ट्रिमका ७ वटा जहाजमार्फत आन्तरिक उडान गरिरहेको छ । 

गोमा एयरले गत वर्ष २ जहाज खरिद गरेकोमा आगामी जनवरीभित्र थप एक जहाज ल्याउने अन्तिम तयारीमा गोमा एयरका निर्देशक सुमन पाण्डेले बताए । “आन्तरिक उडान गर्ने एयरलाइन्सहरू अहिले राम्रो गरिरहेकाले जहाज थप्ने काम धमाधम गरिरहेका छन्,” पाण्डेले भने ।

गोमाले चेकोस्लोभाकियाको जहाज निर्माता कम्पनी एलईटीले उत्पादन गरेको एल–४१० यूभीपी (ई २० सिरिज)का २ जहाजले उडान गरिरहेको छ ।  गोमासँग हाल २ वटा सिंगल इन्जिन जहाजमार्फत दुर्गम क्षेत्रमा यात्रु चार्टर तथा कार्गो उडान गरिरहेको छ ।

नियमित उडान गरिरहेको सिम्रिकले पनि अमेरिकी कम्पनी सिक्रोस्कीले पोल्यान्डमा निर्माण गरेका ४ वटा एम–२८ स्काई ट्रक ल्याउने तयारी थालेको छ । सिक्रोस्कीसँग सम्झौता भइसकेको एयरलाइन्सले यसअघि नै जानकारी दिएको छ ।

१९ सिट क्षमताको यो जहाज दुर्गम उडानका लागि उपयुक्त हुनेछ । यो जहाबाट रामेछाप, लुक्ला, फाप्लु, सुर्खेत, जोमसोम, खानीडाँडासहितका दुर्गम क्षेत्रमा उडान गर्ने योजना छ । नेपाल वायुसेवा निगमले एक एमए ६० र ३ वटा वाई १२ ई  जहाज खरिद प्रक्रियासमेत अगाडि बढेको छ । 

दुई वर्षदेखि उडान सुरु गरेको सौर्य एयरलाइन्सले पनि एउटा जहाजमार्फत उडान गरिरहेको छ । एयरलाइन्सले जेट सीआरजे–२०० सिरिजका थप २ जहाज ल्याउने प्रक्रिया सुरु गरिसकेको छ ।