काठमाडौं : मुलुकमै पहिलोपटक जहाजको
परीक्षण र मर्मतसम्भार (एमआरओ) सेवा सुरु भएको छ । निजी क्षेत्रद्वारा
सञ्चालित बुद्ध एयरले स्वदेशी र विदेशी एयरलाइन्सहरुलाई यस्तो सुविधा
उपलब्ध गराउने भएको हो ।
सरकारले गत भदौमा त्रिभुवन अन्तरराष्ट्रिय विमानस्थलमा रहेको बुद्ध एयरको ह्याङ्गरलाई एमआरओ सेवा दिनसक्ने अनुमति दिएको थियो ।
नेपालमा जहाजको सामान्य चेकजाँच हुने गरे
पनि यस्तो सुविधा यसअघि थिएन । बुद्धका अनुसार अब एटीआर र बीच एयरक्राफ्टको
‘होलबडी’ चेकजाँच र मर्मत गर्न नेपाल बाहिर लैजानु नपर्ने भएको छ ।
बुद्धको ह्याङ्गरबाट सुरु भएको एमआरओ
सेवाले दीर्घकालमा विदेशी एयरलाइन्सका जहाजसमेत मर्मत गर्ने बाटो खुलेको छ ।
“लामो समयसम्मको तयारीपछि एमआरओ सेवा सुरु गरेका छौं,” बुद्ध एयरका
प्रवन्ध निर्देशक वीरेन्द्रबहादुर बस्नेतले भने ।
सरकारले भदौमा अनुमति दिएपछि अहिले विमान मर्मतका सबै कामहरु सुरु भइसकेको बस्नेतले जानकारी दिए । एमआरओ सेवा लिनका लागि अन्तरराष्ट्रिय एयरलाइन्स कम्पनीहरुले समेत चासो दिन थालेका छन् ।
हालसम्म बंगलादेशको नोभो एयर र भुटानको
ड्रुक एयरले मर्मतको सेवा लिन बुद्ध एयरसँग सम्झौता गरिसकेका छन् । बुद्धको
ह्याङ्गरमा हाल १ सय ४६ प्राविधिक कार्यरत छन् ।
एमआरओ परीक्षणको शुल्क नतोकिए पनि ३० हजार
डलरदेखि १ लाख डलरसम्म पर्छ । नेपालमा दुई ठूला विमानस्थल (पोखरा र
भैरहवा) निर्माण भइरहेकाले पनि बुद्ध एयरले सञ्चालन गर्ने एमआरओ सेवाले
धेरै एयरलाइन्सले सेवा पाउने बताइएको छ ।
बुद्धको ३७ हजार वर्गफिट क्षेत्रफलमा
रहेको ह्याङ्गरबाटै यो सेवा उपलब्ध हुने जनाइएको छ । बुद्धले सन् २०१२ मा
झन्डै २५ करोड रुपैयाँ खर्चिएर यो ह्याङ्गर निर्माण गरेको थियो ।
सरकारको अनुमतिसँगै बुद्धले एयरबस ३२० र बोइङ ७३७ जहाजको मर्मतसम्भारको पूर्वाधार तयारी थालेको छ । जसबाट राष्ट्रिय ध्वजावाहक नेपाल वायुुसेवा निगमसहितका निजी क्षेत्रबाट सञ्चालित हिमालय एयरलाइन्ससम्म प्रत्यक्ष लाभान्वित हुनेछन् ।
ठूला जहाजको प्रकृतिअनुसार प्रत्येक १८ महिना अथवा ५ हजार घण्टा उडान गरेपछि सी–चेकिङ र ओभरल चेकिङ गर्नुपर्छ ।
हाल यसका लागि जहाज विदेश लैजानु पर्ने
बाध्यता छ । एउटा जहाजको इन्जिन ओभरल चेकिङ गर्न ५५ करोड, सी–चेकिङ गर्न २५
करोड रुपैयाँभन्दा बढी लागत पर्दछ ।
बुद्धले दिने सेवाबाट सबैभन्दा बढी फाइदा निगमलाई नै हुनेछ । जसका कारण विदेश लैजानु पर्ने बाध्यता हट्ने छ भने खर्चसमेत घट्नेछ ।
निगमले हाल एमआरओका लागि जहाज सिंगापुर
पठाउँदै आएको छ । बुद्धले खासगरी मर्मतका लागि ल्याइने स्पेयर्स
पार्ट्सहरुमा देखिएको करको दरकालाई हेरफेर गर्न सरकारसँग माग गर्दै आएको छ
।
No comments:
Post a Comment