दुर्गम क्षेत्र हवाई सेवा कोष ब्युँताउने तयारी

काठमाडौंः नेपाल नागरिक उड्डयन प्राधिकरणले ‘दुर्गम क्षेत्र हवाई सेवा कोष’ ब्युँताउने तयारी गरेको छ । आन्तरिक वायुसेवा कम्पनीहरूलाई दुर्गम भेगको उडानमा हुने घाटा पूर्ति गर्ने उद्देश्यले पुनः कोष सञ्चालनको तयारी थालिएको हो । प्राधिकरणले डेढ दशकअघि कोष सुरुवात गरी डेढ वर्षसम्म रकम जम्मा गरेको थियो ।

प्राधिकरणको सिफारिसमा संस्कृति, पर्यटन तथा नागरिक उड्डयन मन्त्रालयले सुगम तथा पर्यटन गन्तव्यका विमानस्थलमा उडान गर्दा २४ प्रतिशतसम्म हवाई भाडा वृद्धि गर्न अनुमती दिएको थियो । जसअनुसार विमान कम्पनीहरूले भाडासमेत बढाइसकेका छन् ।

तर, दुर्गम क्षेत्रमा उडान गर्ने एयरलाइन्सहरूलाई भाडा बढाउन अनुमति नदिएपछि सरकारले घाटा पूर्तिका लागि कोष सञ्चालनमा ल्याउन लागेको हो । “विगतमा कार्यबिधि नहुँदा कोष सञ्चालनमा समस्या आएको हो, अव स्पष्ट खाका बनाएर  दुर्गम क्षेत्र हवाई सेवा कोष बनाउन खोजेका छौ,” प्राधिकरणका प्रवक्ता वीरेन्द्र श्रेष्ठले भने ।

प्राधिकरणले विमान कम्पनीहरूसँग छलफल गरिरहेको श्रेष्ठले जानकारी दिए । उनका अनुसार एयरलाइन्सहरूले सैद्धान्तिक सहमति दिइसकेका छन । प्राधिकरण नियमावली २०५८ मा दुर्गम क्षेत्र हवाई सेवा कोषको व्यवस्था छ ।

• वार्षिक ५० करोड रूपैयाँ उठ्ने अनुमान
• चार्टर उडान गर्नेले नियमित उडान गर्नुपर्ने 

 जहाजबाट माउन्टेन फ्लाइट गर्दा एक विदेशी यात्रुबराबर ४ अमेरिकी डलर, अन्य गन्तव्यका उडानमा एक विदेशी यात्रुबराबर २ डलर तथा हेलिकप्टर सेवातर्फ प्रत्येक ‘चार्टर’ उडान गर्दा हुने कुल आम्दानीको २ प्रतिशत कोषमा जम्मा गर्नुपर्ने व्यवस्था छ । 

नेपाल भ्रमण गर्ने वार्षिक ७ लाख पर्यटकमध्ये आधिकांशले एकपटक आन्तरिक उडानमा यात्रा गर्ने तथ्यांक छ । नेपालीसहित आन्तरिकतर्फका हवाई यात्रु वार्षिक १६ लाखभन्दा बढी हुने गरेका छन् । कोष सञ्चालनमा आएमा वार्षिक ५० करोड रूपैयाँभन्दा बढी रकम जम्मा हुने अनुमान छ ।

२०५८ चैतबाट डेढ वर्षसम्म उडान गरिरहेका वायुसेवा कम्पनीले कोषमा रकम जम्मा गरेका थिए । तर, स्पष्ट कार्यविधि नहँुदा बीचैमा बन्द गरिएको उनको भनाइ थियो ।
आन्तरिकतर्फ हेलिकप्टर र हवाई जहाजमार्फत उडान गर्ने एक दर्जन कम्पनीहरू संचालनमा छन् ।

कोष संचालनमा आएमा दुर्गममा चार्टर उडान गरिरहेका एयरलाइन्सहरूले नियमित उडान गर्ने र स्थानीयले लाभ लिन पाउने प्राधिकरणको बुझाई छ । हाल नेपाल वायुसेवा निगम, एयर काष्ठमण्डप, गोमा, मकालु र तारा एयरले दुर्गममा उडान गरिरहेका छन् ।