हिमालयन हवाई रुट–२ खोल्न भारत सहमत

म्यानमार र चीनको सहमति आवश्यक

भारतले हिमालयन हवाई रुट–२ प्रयोगका लागि अनुमति दिने भएको छ । गत साता भारतमा भएको द्विपक्षीय वार्तामा भारतले नेपाललाई हिमालयन हवाई रुट–२ खोल्न सहमति दिएको हो । 

भारतले अनुमति दिए पनि नेपाली पक्षले चीन र म्यानमारसँग सहमति लिन आवश्यक छ । नेपालले यी दुई देशबीच सहमति लिन सके नेपालको आकाश धेरै एयरलाइन्सहरूले प्रयोग गर्नेछन् । जसका कारण नेपालले आकाश प्रयोग गर्न दिएबापत धेरै रकम आम्दानी गर्न 

 सक्नेछ भने नेपालबाट हुने उडानलाई पनि रुट छोटो पर्नेछ । 

“हिमालयन रुट दिने विषयमा भारतले सहमति जनाएको छ, अब म्यानमार र चीनसँग सहमति गरेमा रुट खुल्नेछ,” संस्कृति, पर्यटन तथा नागरिक उड्डयन मन्त्रालयका उपसचिव हरिबहादुर खड्काले भने । खड्का गत साता भएको द्विपक्षीय वार्तामा समेत सहभागी थिए । 

हिमालयन रुट–२ सञ्चालनमा आएपश्चात् काठमाडौं, बागडोरा, गुहाटी, सिलचर, इम्फाल, कुन्मिङ हुँदै हङकङ जोड्ने हवाई रुट खुला हुनेछ । अहिले नेपालबाट हङकङ जान बंगलादेश हुँदै जानुपर्ने लामो दूरीलाई हिमालयन रुटको अनुमतिले एक सय नटिकल माइल तथा करिब २० मिनेटको हवाई दूरी छोटो हुनेछ ।  

हिमालयन  रुट–२ सञ्चालनमा ल्याउनसके युरोप जाने रुटसमेत छोटो हुनेछ ।  यो अनुमतिले नेपालबाट अन्तरराष्ट्रिय उडान गर्ने वायुसेवाले प्रत्यक्ष लाभ लिन पाउने तथा अन्तरराष्ट्रिय उडानका अन्य विदेशी वायुसेवाले हिमालयन रुट प्रयोग गर्ने भएकाले नेपालले आर्थिक लाभसमेत पाउने उपसचिव खड्का बताउँछन् । 

हिमालयन रुटका कारण टोकियोबाट लन्डन जाने जहाजले पनि छोटो हवाई रुटका कारण नेपालको आकाश प्रयोग गर्नसक्ने भएकाले हवाई क्षेत्रको राजस्व बढ्नेछ । उड्डयन नियमअनुसार कुनै पनि देशमाथिको आकाशमा जहाज उडान हुँदा फ्लाइओभर शुल्क तिर्नुपर्ने हुन्छ । 

निगमलाई फाइदै फाइदा 

हिमालयन रुटले सबैभन्दा बढी फाइदा नेपाल वायुसेवा निगमलाई हुनेछ । काठमाडौंबाट हङकङ जाँदा बंगलादेश हुँदै जाने गरिएको हिमालय रुट–२ प्रयोग गर्दा करिब २० मिनेटको दूरी छोटो पर्नेछ । यो दूरी घटेपछि निगमलाई १ हजार ३ सय लिटर इन्धन बचत, एकतर्फी उडानमै १ सय डलर फ्लाइओभर शुल्क घट्ने भएकाले हरेक उडानमा ३ लाख ६४ हजार रुपैयाँ फाइदा हुनेछ । निगम व्यवस्थापनले यसअघि नै सार्वजनिक गरेको प्रतिवेदनअनुसार यो रुटले समय, जहाजको इन्जिन आवर, इन्धन तथा नगद खर्च सबै कम हुने उल्लेख छ ।  

निगमले हरेक अन्तरराष्ट्रिय उडानमा नेपाली आकाशको प्रयोग गरेबापत नेपाल नागरिक उड्डयन प्राधिकरणलाई बाहिरिँदा र भित्रँदा ३ सय ४५ अमेरिकी डलर बुझाउने गरेको छ । फ्लाइओभर शुल्कबापत सम्बन्धित मुलुकले लिने यस्तो रकममा भारत जाँदा २ सय ७० डलर, फर्कंदा ३ सय ११ डलर, बंगलादेश जाँदा ४ सय २० डलर, फर्कंदा ४ सय २० डलर नै तिर्दै आएको छ । निगमले चीन जाँदा ३ सय २ र फर्कंदा २ सय ७० डलर, हङकङ जाँदा र फर्कंदा  १ सय ४२ डलर, म्यानमार जाँदा÷आउँदा २ सय ३८ डलर तिर्दै आएको छ । 

नेपालगन्ज रुट अर्को वार्तामा 

नेपाल आउन भारतले थप दुई रुट दिने र बाँकी रुटको विषयमा माघ महिनामा हुने वार्तामा सहमति दिने भएको छ । गत साता भएको वार्तामा जनकपुर र महेन्द्रनगर रुट प्रयोग गर्न दिने सहमति भएको छ । जसमा आउन र जान दुवैमा भारतले सहमति दिएको उपसचिव खड्काले जानकारी दिए । 

“नेपालका लागि मुख्य रुट नेपालगन्ज हो, माघमा हुने वार्तामा सहमति हुनेछ,” खड्काले भने । नेपालगन्ज नखुलेमा भैरहवा र पोखराको विमानस्थलमा उडान भर्न समस्या आउनेछ । नेपालका लागि भारतले हालसम्म सिमरा रुटमा मात्र अनुमति दिँदै आएको छ ।