रेस्टुरेन्टहरूमा अनिवार्य ‘स्मोकिङ जोन’ को तयारी

काठमाडौं, २८ साउन

रेस्टुरेन्ट एन्ड बार एसोसिएसन नेपाल (रेबन)ले मातहतका सम्पूर्ण रेस्टुरेन्टलाई ‘स्मोकिङ जोन’ राख्न लगाउने भएको छ । सार्वजनिक स्थलमा सुर्तीजन्य पदार्थ सेवनमा रोक लगाउने सरकारी निर्णय कार्यान्वयन गर्न सहज बनाउने उद्देश्यका साथ रेस्टुरेन्ट तथा बारहरूमा ‘स्मोकिङ जोन’ राख्न निर्देशन दिइन लागेको हो ।

सुर्तीजन्य पदार्थ नियन्त्रण र नियमन गर्ने ऐन सदर भएको तीन महिनापछि सार्वजनिक स्थलमा सुर्तीजन्य पदार्थ प्रयोग गर्न नपाइने व्यवस्था कार्यान्वयन गर्ने तयारी भइरहेको बेला रेबनले यस्तो निर्देशन दिन लागेको हो । सुर्तीजन्य पदार्थ नियन्त्रण गर्न कानुनले धेरै ठाउँ समेटेको छ । जसअन्तर्गत होटल र रेस्टुरेन्ट पनि पर्ने भएकाले रेबनले स्मोकिङ जोन राख्न निर्देशन दिन लागेको रेबन तथा ठमेल पर्यटन विकास परिषद्का अध्यक्ष तेजेन्द्रनाथ श्रेष्ठले जानकारी दिए । ३ वर्षअघि नेपाल क्यान्सर सोसाइटीसँग समन्वय गरेको भए पनि कार्यान्वयन हुन नसकेको भन्दै श्रेष्ठले अब सरकारलाई रेबनले पूर्णरूपमा सहयोग गर्ने बताए ।

रेबनले पहिलेदेखि नै रेस्टुरेन्टहरूलाई स्मोकिङ जोन राख्न आग्रह गर्दै आएको थियो । अब भने रेबनमा आबद्ध तथा ठमेलका सम्पूर्ण रेस्टुरेन्ट तथा बारहरूमा अनिवार्य स्मोकिङ जोन राख्न निर्देशन दिने उनको भनाइ छ ।

ठमेलका अधिकांश रेस्टुरेन्टमा यसअघि नै स्मोकिङ जोन राखिएको भए पनि बाँकीमा पनि राख्न निर्देशन दिने श्रेष्ठले जानकारी दिए । केही दिनमै रेबनको बैठकले औपचारिक रूपमा आग्रह गर्ने तयारी भएको श्रेष्ठले जानकारी दिए । रेस्टुरेन्टमा खाना, नास्तालगायत खान ग्राहक आउने भएकोले स्मोकिङ जोन छुट्टै हुँदा सकारात्मक सन्देश जाने भएकाले पनि यो निर्णय कार्यान्वयन गर्न सम्पूर्ण व्यवसायी एक हुनुपर्ने उनको भनाइ छ ।

रेबनमा सयभन्दा बढी रेस्टुरेन्ट आबद्ध छन् भने ठमेलमा मात्र १ सय ५० रेस्टुरेन्ट सञ्चालनमा छन् । रेबनमा आबद्ध रेस्टुरेन्टहरूलाई रेबनमार्फत स्मोकिङ जोन राख्न निर्देशन दिने र ठमेल क्षेत्रका झन्डै १ सय ५० रेस्टुरेन्टलाई परिषद्मार्फत स्मोकिङ जोन राख्न निर्देशन दिने तयारी भएको श्रेष्ठले जानकारी दिए । स्मोकिङ जोनका विषयमा सबै व्यवसायी सकारात्मक छन् ।

नाङ्लोमा सुर्तीजन्य पदार्थ बिक्री नदिइने

ठमेल पर्यटन विकास परिषद्ले ठमेलका सडकमा नाङ्लोमा राखी सुर्तीजन्य पदार्थ बिक्री गर्नेलाई पनि हटाउने भएको छ । त्यसका लागि परिषद्ले नगर प्रहरीको सहायता लिएर अघि बढ्ने तयारी गरेको छ । पर्यटकीय क्षेत्र ठमेलमा सरकारले गरेको निर्णय कार्यान्वयन गर्नु अपरिहार्य भएका कारण यस्तो गर्न लागिएको परिषद्का अध्यक्ष तेजेन्द्रनाथ श्रेष्ठको भनाइ छ ।