नेपाल वायुसेवा निगमले चीनको ग्वान्झाउ उडान गर्न अनुमति लिने प्रक्रिया सुरु गरेको दुई वर्षसम्म पनि स्वीकृति पाएको छैन । चीनले स्वीकृत नदिएपछि नयाँ गन्तव्य थप्ने निगमको योजना अलपत्र परेको छ ।
चीनबाट नेपाल आउने पर्यटक संख्या बढ्दै गएको अवस्थामा निगमले उडान सुरुगरेमा वार्षिक २ लाख चिनियाँ पर्यटक नेपाल ल्याउनसक्ने सरकारी अनुमान छ ।
नेपाल नागरिक उड्डयन प्राधिकरणले निगमलाई एयरलाइन्स अपरेटिङ सर्टिफिकेट (एओसी) एकवर्ष अगाडि नै जारी गरिसकेको छ । चीनको झन्झटिलो प्रक्रियाका साथै ग्वान्झाउको ब्यस्त विमानस्थलका कारण निगमलाई अनुमति लिन हम्मे परेको हो ।
निगमले दुबई र ग्वान्झाउ उडान एकैपटक सुरु गर्नेगरी प्रक्रिया अगाडि बढाएको थियो । तर दुबई उडान सुरु गरेको १० महिना बितिसक्दा पनि ग्वान्झाउको भने उडान भर्ने अनुमतिसमेत आउन नसक्दा निगमको टाउको दुखाई भएको छ । निगमको योजनाअनुसार गत वर्षको जेठबाटै ग्वान्झाउ उडान गर्ने लक्ष्य थियो ।
चीनको हवाई उड्डयनसम्बन्धी आफ्नै प्रक्रिया रहेकोले पनि ग्वन्झाउ अनुमतिको लागि निगमलाई समस्या भएको छ । चीनले आफ्नो देशमा उडान गर्न चाहने एयरलाइन्सहरुको लागि फरम्याट २८७ नियम र फरम्याट १२९ नियम पुरा गराउँदै आएको छ । निगमले दुई वर्षदेखि थालेको प्रक्रियामा फरम्याट २८७ हुदैं फरम्याट १२९ मा गतवर्षनै पुगेको निगमले बताउँदै आएको थियो ।
“चीनको झन्झटिलो प्रक्रियाका कारणले निगमले अनुमति पाउन सकेको छैन,” नेपाल वायुसेवा निगमका प्रबन्ध निर्देशक सुगतरत्न कंसाकारले भने । निगमले अनुमति पाएमा ग्वान्जाउमा दैनिक एउटा उडान गर्ने लक्ष्य राखेर जिएसए समेत नियुक्त गरिसकेको छ ।
चिनियाँ पक्षले मागेका सवै कागजपत्र निगमले पठाएको तर अनुमति पाउन नसकेको कंसाकारले बताए । “ग्वान्झाउ विमानस्थल एकदमै व्यस्त भएकोले अनुमति दिन ढिला भएको चिनियाँ पक्षले बताउने गरेका छन्, सायद अव छिट्टै अनुमति पाउने आशा छ,” कंसाकारले भने ।
बढ्दै छन चिनियाँ पर्यटक
वर्ष चिनियाँ जम्मा
२०१० ४६,७६० ६,०२,८६७
२०११ ६१,९१७ ७,३६,२१५
२०१२ ७१,८६१ ८,०३,०९७
२०१३ १,१३,१७३ ७,९७,६१६
२०१४ १,२३,८०५ ७,९०,११८
२०१५ ७४,७७७ ५,३८,९७०
२०१६ १,०३,९८५ ७,५३,००२
निगमलाई दक्षिण कोरियाले उडान अनुमति दिइसकेको छ । जापानसँग पनि प्र्रक्रिया अगाडि बढाइएको कंसाकारले जानकारी दिए । अन्य मुलुकसँगजस्तो सजिलो चीनसँग नहुने कंसाकारको भनाइ छ ।
निगमले नयाँ एयरबस ३२०–२०० जहाज खरिद गरेर उडान सुरुगरेसंगै ग्वान्जाउ उडान अनुमति लिने प्रक्रिया अगाडी बढाएको थियो । हाल निगमले दुई ठुला वाईडबडी जहाज खरिद प्रक्रिया अन्तिमचरणमा पु¥याईसकेको छ ।
अवको एकवर्ष भित्र निगमसंग एयरबस ३३०–२०० सिरिजका दुई थान जहाज हुनेछन । निगमले ४ जहाज मार्फत दिल्ली, बैंग्लोर, मुम्बई, दोहा, दुवही, मलेसिया, बैंकक र हंङकंङ उडान गरिरहेको छ । निगमसंग हाल अन्तर्राष्ट्रिय उडानको लागि बोईङ ७५७ एक थान र एयरबस ३२०–२०० दुई थान गरी ३ थान जहाज रहेका छन ।
भने भुटान एयरलाइन्सको एकथान जहाज भाडामा ल्याउने प्रक्रिया समेत अन्तिम चरणमा पु-याएको छ । पछिल्लो समय चिनियाँ पर्यटक नेपाल भ्रमणमा आउने संख्यामा उल्लेख्य बृद्धि हुदैं गएकोले पर्यटन व्यवसायी तथा नेपालबाट पनि ठुलो संख्यामा व्यापारिक उद्देश्यले नेपालीहरु चीन जाने गरेका छन ।
सन् २०१६ मा १ लाख ३ हजार ९ सय ८५ चिनियाँ पर्यटक नेपाल भ्रमणमा आएको तथ्यांक रहेको छ । निगमसंग जहाज संख्याथप हुने वित्तिकै सिधा बेईजिङ उडान भर्ने लक्ष्य राखिएको कंसाकारले जानकारी दिए ।
No comments:
Post a Comment