आजदेखि पूरै ठमेल ‘वाई–फाई जोन’

काठमाडौं, ९ असोज

मुलुकको सबैभन्दा बढी पर्यटकीय चहलपहल हुने क्षेत्र ठमेल मंगलबारदेखि ‘वाई–फाई जोन’ हुँदैछ । ३२ औं विश्व पर्यटन दिवसको अवसर पारेर ठमेल क्षेत्रलाई मंगलबार औपचारिक रूपमा वाई–फाई जोन घोषणा गरिँदैछ ।

यससँगै ठमेलका सार्वजनिक स्थानमा समेत बसेर अब ल्यापटप र वाई–फाई सुविधायुक्त मोबाइलबाट उच्च गतिको इन्टरनेट चलाउन सकिनेछ । मर्कन्टाइल कम्युनिकेसन प्रालि र ठमेल पर्यटन परिषद्को संयुक्त पहलमा यो सुविधा दिन लागिएको हो ।

विगत दुई महिनादेखि निश्चित स्थानहरूमा वाई–फाई सुविधा दिइँदै आएको भए पनि मंगलबारदेखि ठमेलका लगभग सबै स्थानमा यो सेवा दिइने परिषद्ले जनाएको छ । ठमेलका क्षेत्रपाटी, सातघुम्ती, ज्याठा, सञ्चयकोष भवन, मनाङ होटलसम्म वाई–फाई चलाउन पाइनेछ ।

“अधिकांश पर्यटक ठमेल क्षेत्र आएर मात्रै अन्यत्र जाने भएकाले नेपालमै पहिलो पटक वाई–फाई सुविधा दिन लागिएको हो,” परिषद् अध्यक्ष तेजेन्द्रनाथ श्रेष्ठले भने । उनका अनुसार दसैंसम्म निःशुल्क र त्यसपछि निश्चित रकम तोकेर सेवा दिइनेछ । वाई–फाईका लागि मर्कन्टाइलले ४ करोड रुपैयाँ लगानी गरेको छ ।

दसैंपछि स्क्र्याच कार्डमार्फत यो सेवा बिक्री गरिने परिषद्ले जनाएको छ । यसका लागि प्रतिघण्टा १७ रुपैयाँ मूल्य तोकिएको छ । त्यसपछि पूरै दिन, हप्ता र महिनाका लागि पनि स्क्र्याच कार्डको सुविधा विस्तार गरिने जानकारी श्रेष्ठले दिए । स्क्र्याच कार्डभित्र सञ्चालकको नाम तथा पासबर्ड हुन्छ ।

स्क्र्याच कार्ड लिन नेपाली उपभोक्ताले आफ्नो परिचयपत्रको फोटोकपी र विदेशीले पासपोर्टको फोटोकपी बुझाउनुपर्नेछ । सुरक्षाको कारण जनाउँदै र अन्यत्र यसको प्रयोग नहोस् भनेर सुरक्षा प्रशासनले त्यस्तो माग गरेकोले परिचयपत्र खुलाउनेलाई मात्र स्क्र्याच कार्ड उपलब्ध गराइने भएको श्रेष्ठले बताए । उनका यस्तो कार्ड ठमेलका रेस्टुराँ, होटल, सुपरमार्केटलगायतका स्थानमा पाइन्छ ।

वाई–फाईको सुविधामार्फत उठेको रकमको ३० प्रतिशत स्क्र्याच कार्ड विक्रेता, १० प्रतिशत परिषद् र ६० प्रतिशत मर्कनटाइलले पाउनेछन् ।

परिषद्ले ठमेलभर वाई–फाईको सुविधा दिनेगरी योजना ल्याउन प्रस्ताव गरेपछि आफूहरूले लगानी गरेको मर्कन्टाइलका सञ्चालक प्रचण्ड शाक्यले बताए । “हाम्रो सुविधा अन्यको भन्दा उच्च गति र गुणस्तरको भएकाले नै हामीलाई प्रस्ताव आएको हो,” उनले भने ।

परिषद् र मर्कन्टाइलको सहकार्यमा दसैंलगत्तै पोखरा, चितवनको सौराह, लुम्बिनीलगायत स्थानमा पनि वाई–फाई सुविधा दिन लागिएको जानकारी श्रेष्ठले दिए ।