रेस्टुराँ तथा बारहरूमा ‘स्मोकिङ जोन

काठमाडौं, ८ असोज

रेस्टुरेन्ट एन्ड बार एसोसिएसन नेपाल (रेबन) ले मातहतका सम्पूर्ण व्यवसायीहरूलाई ‘स्मोकिङ जोन’ राख्न निर्देशन दिएलगत्तै उनीहरूले स्मोकिङ जोन राखेका छन् । सार्वजनिक स्थलमा सुर्तीजन्य पदार्थ उपभोगमा रोक लगाउने सरकारी निर्णय कार्यान्वयन गर्न सहज बनाउने उद्देश्यका साथ व्यवसायीहरूले रेस्टुराँ तथा बारहरूमा स्मोकिङ जोनको व्यवस्था गरेका हुन् ।

सरकारले सुर्तीजन्य पदार्थ नियन्त्रण र नियमन गर्ने ऐन सदर भएको तीन महिनापछि सार्वजनिक स्थलमा सुर्तीजन्य पदार्थ प्रयोग गर्न नपाइने व्यवस्थालाई कार्यान्वयन गर्ने बताएलगत्तै रेबनले मातहतका रेस्टुराँ तथा बारहरूमा स्मोकिङ जोन राख्न निर्देशन दिएको थियो ।

सुर्तीजन्य पदार्थ नियन्त्रण गर्न कानुनले धेरै ठाउँ समेटेको छ । जसअन्तर्गत होटल तथा रेस्टुराँ पनि पर्ने भएकाले रेबनले स्मोकिङ जोन राख्न निर्देशन दिएकोमा प्रायले कार्यान्वयन गरेको र स्मोकिङ जोन नराखेका रेस्टुराँहरू पनि यसको तयारीमा रहेको रेबनका अध्यक्ष तेजेन्द्रनाथ श्रेष्ठले बताए । “व्यवसायीका तर्फबाट हुनेसम्मको पहल गरेका छौं,” उनले भने, “यसमा सरकारले चासो दिनुपर्छ ।” सरकारले चासो नदिए यो व्यवस्था पनि प्रभावकारी बन्न नसक्ने उनको भनाइ छ ।

“हामीले पहिलेदेखि नै रेस्टुराँहरूलाई स्मोकिङ जोन राख्न आग्रह गर्दै आएका थियौं,” उनले भने, “अहिले भने रेबनमा आबद्ध तथा ठमेलका सबैजसो रेस्टुराँ तथा बारहरूमा स्मोकिङ जोन जोन राखिएको छ ।” रेस्टुराँमा ग्राहक खानपिनका लागि आउने भएकाले त्यस्ता ठाउँमा स्मोकिङ जोन छुट्टै हँुदा अन्यत्र सकारात्मक छाप पर्ने देखेर सबै व्यवसायीले रेबनको अभियानमा साथ दिएको उनले जानकारी दिए ।

हाल विशेषगरी ठमेल क्षेत्रमा रहेका रेस्टुराँहरूले स्मोकिङ जोनको व्यवस्था गरेका छन् । व्यवसायीहरूले स्मोकिङ जोन र नन स्मोकिङ भनेर लेखेर टाँसेका छन् । त्यसले गर्दा धूमपान नगर्ने ग्राहकहरू उत्साहित भएको पाएको लिली रेस्टुरेन्ट एन्ड बार सञ्चालक काजीबाबु श्रेष्ठको भनाइ छ । “रेबनले निर्देशन नदिएको भए पनि स्मोकिङ जोन छुट्टै राख्नुपर्छ भन्ने लागेको थियो,” उनले भने, “निर्देशनपछि त राख्न बाध्य पनि भयौं ।”

रेबनमा आबद्ध रेस्टुराँको संख्या सयभन्दा बढी छ भने ठमेलमा मात्र १ सय ५० रेस्टुराँ छन् । रेबनमा आबद्ध रेस्टुराँहरूलाई रेबनमार्फत र ठमेल क्षेत्रका रेस्टुराँहरूलाई ठमेल पर्यटन विकास परिषद्मार्फत स्मोकिङ जोन राख्न निर्देशन दिइएको थियो ।

नाङ्लोमा सुर्तीजन्य पदार्थ बिक्री गर्न रोक

ठमेल पर्यटन विकास परिषद्ले ठमेलका सडकमा सुर्तीजन्य वस्तु नाङ्लोमा राखी बिक्री गर्नेलाई हटाउन थालेको छ । परिषद्ले नगर प्रहरीको सहयोगमा यो काम गर्न थालेको हो । पर्यटकीय क्षेत्र ठमेलमा सरकारी निर्णय कार्यान्वयन गर्नु अपरिहार्य भएकोले यस्तो गरिएको परिषद्का अध्यक्ष तेजेन्द्रनाथ श्रेष्ठले बताए ।