कारोबार संवाददाता
काठमाडौं, ४ पुस
नेपाल पर्यटन बोर्डमा रिक्त सञ्चालक समिति सदस्य पदपूर्ति छनोट समितिको संयोजकमा रहन पर्यटन तथा नागरिक उड्डयन मन्त्रालयको प्रस्तावलाई सह–सचिव रञ्जनकृष्ण अर्यालले अस्वीकार गरेका छन् ।
मन्त्रालयको प्रस्ताव अस्वीकारसँगै बोर्ड सदस्य र बोर्डको सीईओ छनोट प्रक्रिया अझै लम्बिने भएको छ । बोर्ड सदस्यहरूको समयावधी सकिएर खाली भएको स्थानमा पदपूर्ति गर्न मन्त्रालयले बोर्ड सदस्य छनोट समिति गत साता बनाउने जानकारी दिए पनि हालसम्म गठन हुन सकेको छैन ।
बोर्डको प्रमुख कार्यकारी नियुक्ति गराउने जिम्मा पाएको छनोट समितिका सदस्यहरूको समयवधी सकिएपछि प्रक्रिया नै अबरुद्ध छ । यो अन्योल हटाइ प्रक्रियालाई छिटो सुचारु गराउन बोर्ड सदस्य नियुक्ति प्रक्रिया अगाडि बढाउन छनोट समिति तय गर्न लागेको भए पनि अर्यालले अस्वीकार गरेपछि दुवै प्रक्रिया अबरुद्ध भएको छ ।
मन्त्रालयले अर्याललाई छनोट समितिको संयोजकमा प्रस्ताव गरेको तर उहाँले नबस्ने जानकारी दिएकाले समिति निर्माण प्रक्रिया रोकिएको मन्त्रालयका प्रवक्ता हरि बस्यालले जानकारी दिए । अर्यालले आफ्नो व्यस्तता देखाउँदै छनोट समितिमा नबस्ने बताएको बस्यालले जानकारी दिए । तर स्रोतका अनुसार प्रधानमन्त्री पत्नी हिसिला यमी र पर्यटनमन्त्री लोकेन्द्र बिष्टबीच आफूनिकटकालाई सदस्य बनाउन हानाथाप सुरु भएपछि उनले पद अस्वीकार गरेका हुन् । “अब छिट्टै मन्त्रालयले अर्को नाउँ तय गरेपछि समिति निर्माण हुन्छ,” बस्यालले भने । सार्वजनिक निजी साझेदारीको अबधारणा (पीपीपी) बमोजिम बोर्डमा व्यावसायिक प्रतिनिधि राखिने प्रावधान छ ।
बोर्डको कार्यकारी प्रमुख नियुक्त प्रक्रिया अगाडि बढाउन बोर्ड सदस्य नियुक्त गर्नुपर्ने भएकाले मन्त्रालयले छिट्टै बोर्ड सदस्य नियुक्ति प्रक्रियालाई अगाडि बढाउन लागि रहेको बस्यालले जानकारी दिए । मन्त्रालयका सह–सचिवस्तरीय छनोट समितिले व्यावसायिक संघसंस्थासँग छलफल गरी पाँच जनाको नामावली मन्त्रालयमा पठाउने र मन्त्रीस्तरीय निर्णयले तीन जनाको नियुक्ति बोर्ड सदस्यका रूपमा गरिने प्रावधान छ ।
यसअघि व्यावसायिक संस्थाको प्रतिनिधित्व गर्ने गणेश सिम्खडा र ङिमी शेर्पा बोर्ड सदस्य थिए । उनीहरू नियुक्त भएको ४ वर्षे कार्यकाल सकिएको छ । अर्का सदस्य धु्रवनारायण श्रेष्ठको समयवधी सकिएको छैन । “बोर्ड सदस्यहरूनै छनोट समितिका सदस्यहरू रहेकामा हाल उनीहरूको समय सकिएपछि सीईओ छनोट प्रक्रिया रोकिएको हो,” बस्यालले भने । बोर्ड सदस्य पनि नयाँ र सीईओ छनोट समिति पनि नयाँ भएपछि मात्र नियुक्ति प्रक्रिया अगाडि बढ्ने मन्त्रालयले बताउँदै आएको छ ।
पीपीपीबमोजिम बोर्डमा व्यावसायिक प्रतिनिधि राखिने गरेको भए पनि मन्त्रीको हस्तक्षेप हुने गरेको बताउँदै व्यवसायीले यसपटक कुनै पनि हालतमा त्यस्तो हुन नदिने बताइ रहेको बेला छनोट समितिमा नै तीन जनामध्ये दुई जना व्यावसायिक प्रतिनिधित्व हुने भएकाले त्यस्तो नहुने मन्त्रालयले प्रष्ट पारेको छ । बोर्ड सदस्यमा पर्यटन व्यवसायीको प्रतिनिधिका रूपमा नेपाल एसोसिएसन टुर एन्ड ट्राभल एजेन्ट्स (नाट्टा), ट्रेकिङ एजेन्सी एसोसिएसन अफ नेपाल(टान), होटल एसोसिएसन नेपाल (हान), नेपाल पर्वतारोहण संघ (एनएमए) लगायतबाट छनोट गरिन्छ । १३ वर्ष अगाडि पर्यटन विभागलाई विघटन गरी पीपीपी अवधारणाअनुसार नेपाल पर्यटन बोर्डको गठन गरिएको थियो ।
